“Weird.” Dink ek by myself en scroll verby. En dan nog so ‘n post. Nee die dame kla oor daai meisietjie, en stuur sommer screenshots van privaat gesprekke vir Admin.
“Wat de donner gaan nou aan?” Wonder ek. Ek loer by die venster uit. Nee, dis nie volmaan nie. Ek scroll, en daar is nog so ‘n post. En nog een. Ek kry ‘n koue rilling. Ek het sopas ‘n terugflits gekry van my hoërskool jare. Meisies wat teefgevegte het en mekaar se oë wil uitkrap. Laaities wat mekaar wil boks. Is hierdie regtig mense wat hier in een van die mees gegoede areas in Suid-Afrika bly wat so optree!? Nou volk en vaderland, hoe op dees aarde gaan dit daar in die weste?
“Ja Afrikaners, hoe dan nou anders. Gun nie die son op jou buurman se agterwêreld nie.”
Dit herinner my aan daai sêding: “Die enigste keer wat Afrikaners saam gestaan het, was op die boot oppad St Helena toe. Maar dit was ook maar net omdat daar nie plek was om te sit nie.”
Mense, sien julle wat om julle aangaan? Hou julle die politiek dop? En dit gebeur nie net op die plase nie. Dit gebeur hier tussen ons. Net hierdie week is ‘n dierbare, weerlose oom grusaam tussen ons vermoor.
Ek sien hoe rol jy jou oë. Nee, ek is glad nie ‘n kakiebroek draer of ‘n vierkleur swaaier nie. Ek is net ‘n gewone stadsjapie wat nie ‘n probleem met niks en niemand het nie. My Ma het my geleer om almal ewe veel te respekteer ongeag van velkleur. Ek is ‘n glas halfvol ou. Altyd hoop.
Maar ek loop deesdae rond met ‘n frons.
Ek hoor so week of wat terug ‘n dame vertel dat sy eerder haar eie kleinkinders sal doodmaak voordat sy sal toelaat dat hulle vir ure gemartel en verkrag sal word as haar huis ooit ingeval sal word. Dit is die allervreeslikste ding om te dink. Die gedagte dat ‘n Ouma moet dink oor wat sy gaan doen om haar kleinkinders te beskerm die dag as haar huis ingeval word, want hulle kom nie net om te steel nie. Hulle kom om seer te maak. GEEN Ouma moet ooit in daai posisie geplaas word om eers daaroor te hoef te dink nie. Ook nie ‘n Ma of Pa of broer of suster nie. Maar dit is die realiteit. Dit is die era in die Suid-Afrikaanse geskiedenis waarin ons nou leef.
Maak bietjie sommetjies. Volgens die 2011 sensus is ons is sowat 2.7 miljoen wit Afrikaans sprekendes. In die 2016 verkiesing het die EFF 3.2 miljoen stemme gehad. Ons is in die minderheid. Kyk na die ou se profile wat voor jou gepost het. En die dame wat na jou gepost het. DIT is die mense op wie jy moet kan steun. Ons is al wat ons het. Jou buurman. My buurman. Dit is die mense wat vir ons daar gaan wees in ‘n oomblik van nood. Niemand anders gaan kom om jou te help nie. Amerika het ‘n saak. Brittanje het ‘n saak. Australië? Wie weet.
Nou? Nou wil ons nog ‘n kerk afstig? Nou wil ons moan oor Sarie nou my melktert resep vir Magda gegee het? Nou gil ek vir buurman Dawie hier oor die muur want sy grassnyer is Saterdag oggend al 9 uur te luidrugtig aan die gang?
Regtig mense? Moet jy nie bietjie mooi dink oor wat jy doen en sê nie? Die wêreld is groter as net jou Facebook feed. Jy voel dalk vandag vreeslik oulik oor jouself oor daai sarkastiese post of iets - wie weet wat - bereik deur vir Louis Bruwer ‘n screenshot te stuur. Maar more, oormore, volgende week gaan jy vir Sarie en Magda en Dawie nodig hê. Ek haat dit om doemprofeet te speel, maar enige iemand kan sien ons Afrikaner volk gaan deur ‘n moeilike tyd.
Ons ry nie meer ossewaens nie, ons dra nie meer die kam in die kous nie en ons ken nie meer die woorde van die vlaglied nie. Maar Afrikaans is in ons bloed. Ons is trotse mense. Ons het Suidelike Afrika se sand hier tussen ons tone gevoel, en dit is hoe en waar ons geanker is. Dit is soveel ons land as enige Zoeloe, kleurling, Indiër, Xhosa, ens. sin.
Ek gaan nou bietjie kru wees, maar dit gaan de boodskap beter oordra – verskoon maar:
Hou op met jou fokken kinder-kak hier op Facebook, op straat, agter die konsistorie, in Koffietijd se tuin.
Steek jou hande uit jou moue uit na die mense om jou en hou op met gebalde vuiste staan. Hierdie mense is al wie jy het om jou te help.
My vraag aan jou is: Is dit regtig so moeilik om vriendelik te wees? Wat presies kry jy uit jou bitsigheid uit? Na watter mens toe gaan jy draai, die dag wanneer jy op jou mees weerlose is? Gebruik jou verbeelding en verbeel jou die massas storm by hulle duisende Waterkloof of Silver Lakes binne vir ‘n stukkie grond? Wat dan?
Ek is jammer, dit klink so bietjie soos ‘n preek, maar julle moet oor die goeters dink. Ondersteun mekaar se besighede. Kom bymekaar vir ‘n skaaptjoppie. Leer ken jou buurman se naam, al bly jy nou al 7 jaar langs hom.
Soos 100 jaar terug is Afrikaners weer aan hul eie lot oorgelaat. Ek en jy is al wat ons het in hierdie tyd. I’ve got your back. Do you have mine?
Kollekte sal by die deur opgeneem word. 😁
Oorspronklik gepost op Facebook - Ek's van die Ooste groep - 20 Maart 2018
0 comments:
Post a Comment